Yolanda survivor Merlinda
Inocencio of Estancia, Iloilo shared the following story of how her family is
rebuilding their fishing livelihood, during the 22nd annual membership meeting of
the Center for Community Transformation Group of Ministries in March 2014. To read this story in English, please click HERE.
Magandang gabi po sa
lahat! Nagpapasalamat ako sa Panginoon sa pagkakataon na maipaalam sa marami
ang kanyang kabutihan sa akin at sa aking pamilya. Ako po ay si
Merlinda Inocencio ng Estancia, Iloilo. Ako at ang aking asawa ay may apat na
anak at anim na apo. Ang pamilya ko po ay kabilang sa mga
sinasabing fisher folk. Ang aming bayan na Estancia ay binansagang ‘Alaska
of the Philippines’ dahil sa dagat sa paligid namin nanggagaling ang maraming alimasag
na mabibili dito sa Maynila.
Ako po ay isang community
partner ng CCT. Walong taon na po akong nakakatanggap ng mga
microfinance loan mula sa CCT Credit Cooperative. Sa tulong po ng
mga loan na ito, ako po ay nakapagpundar ng dalawang pumpboat na
ginagamit sa pangingisda; ang nahuhuling isda ay binebenta ko sa fish port ng
Estancia. Sa pagpapala ng Panginoon nakapagtapos ng college ang lahat ng anak
ko. Ang panganay commerce ang natapos, ang sumunod ay nursing ang natapos, at
ang dalawa ay IT.
Ang mga bangka namin ay
nakapagbigay rin ng trabaho sa sampung ulo ng pamilya bilang piloto, makinista,
at pahinante. Ang mga tatay na ito ay sumusuporta sa 25 na mga bata.
Ang Estancia ang isa sa
mga bayan na malubhang tinamaan ng Yolanda. Naranasan po namin ang
magkaroon ng walong talampakan na tubig sa loob ng bahay. Kinailangang tumalon
kami mula sa aming terrace para makaligtas. Salamat sa Panginoon na walang
nalunod sa amin, at ang buong pamilya ay buhay.
Maraming salamat sa mga
ginamit niya upang mabigyan kami at mga kapitbahay ng relief pagkatapos ng
Yolanda. Napuntahan din kami ng mga doctor at nabigyan ng kailangang
mga gamot.
Ang na-apektohan ng husto
ay ang aming kabuhayan at isa sa aming trabahador. Hindi na namin
nakita muli ang dalawang pump boat namin, at isa rin sa mga
nagtatrabaho para sa amin ang hindi pa makita hanggang ngayon.
Dahil sa wala kaming
alam na ibang pagkakakitaan kundi ang pangigisda, malaking bagay ang muli akong
napahiram ng CCT para makapagsimula muli sa pagnenegosyo. Ako ay
binigyan ng P70,000 na loan at ito ay ginamit ko na ipambili ng panibagong pump
boat, motor, at mga net. Muli na po kaming nakakapangisda at muli na
rin po ako nakakapagtinda sa fish port. Malakas po ang aking pag-asa
na muli pong babangon ang aming kabuhayan sa at pagpapala na rin ng ating
Panginoon.
Ang pagpapalang ito ay
ipinapaabot ko rin po sa mga anak ng aming trabahador na nawala sa Yolanda. May
naiwan po siyang dalawang anak na babae, isang grade 7 at isang grade
4. Nakatira po sila ngayon sa Bantayan Island sa
Cebu. Pinapadalhan ko po ang mga bata ng tulong para makapagpatuloy
sila ng pag-aaral.
Pagkatapos po ng Yolanda,
nagsimula pong magkaroon ng Sunday worship services sa CCT office sa lugar
namin. Ako po ay regular na dumadalo dito. Ginamit ng
Panginoon ang bagyong Yolanda para ako ay mapaalalahanan ng kahalagahan ng
ating relasyon sa kanya. Nakita ko sa bagyong ito na wala tayong
magagawa liban sa kanya, na hawak niya ang ating buhay at ang lahat ng
pangyayari sa mundo ay na sa kanyang pamamahala.
Maraming salamat po at
pagpalain nawa tayo ng Panginoon!
